Celeste tesoro
d’eterna allegria:
drommi, vida e coro,
reposa, a ninnia.

Sole relughente
d’eternu lugore,
su pius bellu fiore
ch’hat dadu s’Oriente,
gravellu eccellente,
bellu pius de s’oro
Reposa a ninnia.
Drommi, vida e coro.

Sole ch’egualas
a sa deidade,
a sa majestade
de sas santas alas.
Gala pius de gala
de sa gerarchia.
Drommi, vida e coro,
reposa, a ninnia.

In su pius rigore
de sa notte oscura,
bettas isplendore
chin grande lugura.
Regnas in s’altura
chin soberania.
Drommi, vida e coro,
reposa, a ninnia.

Pitzinnu graziosu,
benignu e giocundu,
su Re de su mundu,
de sos santos gosu,
columbu amorosu
de sos giustos ghia.
Drommi, vida e coro,
reposa, a ninnia.

Nadu in d-una istalla,
tale poverittu,
fattende battaglia
chin famine e frittu,
a s’omine afflittu
Mustras tantu amore.
Reposa, a ninnia
Fizu e Salvadore.

Erodes potente
chilca Deus ispiare,
sette miza innotzentes
hat fattu decollare,
chelfende incontrare
su veru Messia.
Drommi, vida e coro,
reposa, a ninnia.

Infame canaglia
chi s’inferru tremes,
tue es chi sustenes
forte sa battaglia,
potente muraglia
de ricca osteria.
Drommi, vida e coro,
reposa, a ninnia.

S’anghelu avvisadu
hat a sos pastores,
cantende onores
chi Gesus fit nadu:
su Verbu umanadu
fizu ‘e Maria.
Drommi, vida e coro,
reposa, a ninnia.

Drommi su segundu
de Giacobbe istella,
sa pius ricca prella,
preziada in su mundu.
Infante e giocundu
T’istimo e ti adoro.
Reposa, a ninnia.
Drommi, vida e coro.

Cale est cuddu amante
chi mai s’est intesu,
sende pius offesu
amat pius costante,
chircat ogni istante
s’omine malvadu.
Reposa a ninnia
Drommi, Fizu amadu.
Betlem inTerra Santa,
felice e giocunda,
de grazia fecunda
esultas e cantas
……………..
pro chi bi est nadu.
Reposa, a ninnia,
drommi, Fizu amadu.

Solima ispantada
chin tottu s’Oriente,
un’istella lughente
li dat imbasciada,
ca s’est umanada
sa Sabidoria.
Drommi vida e coro,
reposa a ninnia.

Lettu ‘e broccadu
no ti preparesin,
su fenu ti desin
lettu duru e siccu,
sende su pius riccu
potente Segnore.
Reposa, a ninnia,
Fizu e Savadore.

Onzi nazione
ti acclamat diciosa,
de Gericu rosa,
cipressu ‘e Sione,
erede ‘e Salomone,
tronu sublimadu.
Reposa, a ninnia,
drommi, Fizu amadu.

Sos Res d’Oriente
benin umiliados
e imbenujados,
tottu unidamente,
li donan presente
mirra, incensu e oro.
Reposa, a ninnia,
drommi, vida e coro.