Sa primma Rughe: Gesus est cundennadu
In custa prima rughe cunsidera
su Segnore innozente han cundennadu,
a sos Giudeos l’hana cunsegnadu,
chi l’han leadu de mala manera.

Sa ‘e duas Rughes:
De custa rughe a s’innotzente Anzone
bi l’han subra sas palas garrigada,
sa testa de ispinas coronada,
non si rezet in pe’ cun sa pessone.

Sa ‘e tres Rughes:
Sutta sa rughe in sa via pedrosa
est ruttu a cara a terra umiliadu,
sos Giudeos a frusta l’han pesadu
pro cumprire sa pena dolorosa.

Sa ‘e battor Rughes:
Cristos in cust’impresa rara e santa
s’agattat cun sa mama addolorida,
li narat: “Coro ‘e mama, ite ferida
chi m’hat fattu s’ispada a s’ala manca.

Sa ‘e chimbe Rughes
Est affrigidu su Fizu ‘e Deu,
sa forza est cuminzende a li mancare
obrigan de si poder garrigare
de sa rughe Simone Cireneu.

Sa ‘e ses Rughes
In custa sesta rughe appiagada
Veronica devota l’incontresit,
su ‘elu dae testa si leesit
e li frobit sa cara insambenada.

Sa ‘e sette Rughes
Custa segunda rutta dolorosa
sutta su pesu ‘e sa pesante rughe,
ispiu de sa sua vera lughe
de ‘nde salvare ogn’anima penosa.

Sa ‘e otto Rughes
A pese ‘e rue intendet su piantu,
ma sun aprobe sas feminas pias:
“Non pianghedas, no, sas penas mias,
pianghide sa ‘ostra donzi tantu”.

Sa ‘e noe Rughes
Sa ‘e tres boltas in cussu caminu
est ruttu subra s’ispinosa rua,
una piaet sa carena sua,
non si lamentat su Verbu Divinu.

Sa ‘e deghe Rughes
Istrazzuladu, pistu e mesu mortu
l’han de sos bestires ispozadu,
cun fele e mirra abiveradu
chena li dare perunu cunfortu.

Sa ‘e Undighi Rughes
Como l’hana a sa rughe giaittadu
cussos Giudeos sas manos e pese.
O peccadore, piangher lu dese,
ca l’han pro neghe tua cundennadu.

Sa ‘e Doighi Rughes
In su logu fatale su Messia
l’hana ingravadu in su Golgota Monte.
Giamat su Babbu sou, alzat sa fronte,
pius lezera sa dura agonia.
“Sa voluntade tua e non sa mia
siat fatta e s’oscura s’orizonte”.
Li dan s’aghedu in punta a una canna
e ispirat giamende a boghe manna.

Sa ‘e Treighi Rughes
Benit Zuseppe de Arimatea
cun Nicodemu e si lu faghen dare,
in bratzos de sa mama a l’attitare:
de su dolore non si rezet rea.

Sa ‘e battordighi Rughes
De alòe e de mirra l’han untadu
totos duos cun dolu e forte pena.
Inie fit Maria Maddalena
e ateras Maria ch’hada amadu.
Li cuguzan sa noa sipoltura
de labida pesante sa pius dura.

Invocassione
Como Segnore meu ti domando,
ammentadi de nois in cust’ora,
totta s’umanidade t’incumando
de custa terra ingrata ingannadora.
Perdona sos chi t’hana mortu tando
e a nois chi t’occhimus ancora.
Da a nos tue sa pena meritoria
pro intrare cun tegus in sa gloria.