O tristu e fatale die,
oras penosas e duras:
cagliadebos, criaturas,
lassade pianghere a mie!

A mie toccat su piantu,
a mie su sentimentu,
devo piangher de assentu
e giugher s’oscuru mantu,
ca so’ affliggida tantu,
chie t’hat mortu e chie?
Cagliadebos…

A mie toccat su dolu,
pro chi su mortu est su meu,
a mie toccat su teu
a mie su disconsolu.
Fizu, de mamma consolu,
chie t’hat mortu e chie?
Cagliadebos…

Josefe de Arimatea
dae sa rughe t’isclavesit,
in bratzos mios ti ponzesit,
coro de s’anima mia.
Fizu, de mamma allegria,
chie t’hat mortu e chie?
Cagliadebos…

Abertu tenzo su coro,
su pettus tenzo frecciadu,
de cantu m’hana afferradu
su riccu meu tesoro.
Narami, prenda ‘e oro:
chie t’hat mortu e chie?
Cagliadebos…

Como già mi sun passadas
sas antigas allegrias,
ei como in agonias
si sun totu cambiadas.
Fizu de intragnas sagradas:
chie t’hat mortu e chie?
Cagliadebos…

Nade, nade, peccadores,
ite aggravios bos hat fattu?
Risponde, populu ingratu,
ite sun custos favores?
Fizu, mortu cun rigore:
chie t’hat mortu e chie?
Cagliadebos…

Cristianos, pro amore ‘e Deu,
in custu fatale die
interrade puru a mie
a lados de fizu meu.
Fizu, de mamma recreu:
chie t’hat mortu e chie?
Cagliadebos…

Morte, non mi lasses bia,
morte, non tardes piusu,
ca sende mortu Gesusu
non podet viver Maria.
Coro ‘e s’anima mia:
chie t’hat mortu e chie?
Cagliadebos…

O Anghelos de s’altura,
o Giuanne e Madalena,
accumpagnade cun pena
su mortu a sa sepoltura.
Fizu, de mamma tristura:
chie t’hat mortu e chie?
Cagliadebos…

Frades e sorres, benide
cun su coro umiliadu,
de ogni culpa e peccadu
de coro bos repentide,
suspirade e pianghide
de coro pro ogni die.
Cagliadebos…

O tristu e fatale die,
oras penosas e duras:
cagliadebos, criaturas,
lassade pianghere a mie!